Zure maskota autoan: zer dioen arauak eta nola joan seguru

Araua

Gidariak ondo kokatu behar ditu daramatzan animaliak, gidatzeari oztoporik egin ez diezaioten (Zirkulazioko Erregelamendu Orokorraren 18. art.). Ez du esaten nola, baina autoan zehar mugitzen den edo gidariaren gainean esertzen den animalia aske batek ez du betetzen.

7/2023 Legeak bi debeku gehitzen ditu: auto itxi batean bakarrik uztea bizia arriskuan badago (24.2.d art.) eta martxan dagoen ibilgailu motordun bati lotuta eramatea (27.f art.).

Nola eraman

• Garraio-kaxa, aurreko eserlekuen atzean lurrean edo maletategian ondo lotuta. Hori da seguruena katuentzat, txakur txikientzat eta ugaztun txikientzat.
• Segurtasun-arnesa, segurtasun-uhalari lotuta. Inoiz ez lepokoari: bat-bateko balazta batean, tirakada lepora doa.
• Banatzeko sareta edo sarea, auto handi baten maletategian badoa.
• Bidaia luzeetan, gelditu bi orduz behin gutxi gorabehera, edan dezan, bere beharrak egin ditzan eta hankak luza ditzan.

Beroa

Eguzkitan, auto itxi bat labe bihurtzen da minutu gutxitan, leihatila pixka bat irekita utzi arren. Udan zure maskotarekin bidaiatzen baduzu, antola zaitez barruan utzi behar ez izateko, ezta une batez ere.