Chega un gatiño á casa: como non morrer de amor (nin de estrés)

Un gatiño recén chegado é unha bóla de curiosidade, pero tamén de inseguridade. Todo cheira distinto e non sabe onde está nada. Se lle dás un comezo tranquilo, gañará confianza moi rápido e en poucos días velo correndo coma se fose o dono do piso. Que, no fondo, serao.

Unha habitación base

En lugar de soltalo en toda a casa, prepárale primeiro unha habitación tranquila con todo o necesario. É máis doado sentirse seguro nun espazo pequeno e coñecido, e desde aí irá ampliando o seu territorio aos poucos.

• Areeiro con area axeitada, lonxe da comida.
• Comedeiro e bebedoiro, separados do areeiro.
• Unha cama e algún agocho tipo cova ou caixa de cartón.
• Un pequeno rabuñadoiro.
• Xoguetes axeitados para o seu tamaño.
• O mesmo alimento que tomaba antes, para non cambiarlle a dieta de golpe.

Unha casa a proba de gatiños

Os gatiños métense por calquera oco e tráballo todo. Antes de que chegue, recolle cables, cordóns, gomas do pelo, fíos e obxectos pequenos. Comproba ventás e balcóns, aparta plantas que poidan ser tóxicas para gatos e revisa que non poida colarse detrás dos electrodomésticos.

Os primeiros días

Deixa que saia do transportín cando queira, sen sacalo á forza. Séntate preto, fala con calma e deixa que sexa el quen se achegue. Se se agocha, non pasa nada: é a súa forma de observar. Cando o vexas cómodo na súa habitación, ábrelle aos poucos o resto da casa.

Xoga con el con canas e xoguetes, non coas túas mans. O que de pequeno ten graza, de adulto con unllas e dentes tena bastante menos.

Se hai outros animais na casa, as presentacións deben ser graduais: primeiro cheiros, despois miradas a través dunha porta entreaberta ou dunha barreira, e só logo encontros supervisados.

Visita ao veterinario

Pide cita nos primeiros días para unha revisión xeral. O teu veterinario indicarache o calendario de vacinas e desparasitación, falarache da identificación con microchip e da esterilización, e resolverá as túas dúbidas sobre alimentación.

En Petuki tes areeiros, camas, rabuñadoiros, transportíns e xoguetes para recibir o teu gatiño como se merece.