A túa mascota e a comunidade de veciños: ladridos, ascensor e zonas comúns
Os problemas cos veciños adoitan empezar por ruído, cheiros ou o ascensor. Que di a Lei de propiedade horizontal e como evitar o conflito.
O que di a lei
No teu piso non podes facer actividades prohibidas nos estatutos da comunidade nin actividades molestas, insalubres ou perigosas. Se pasa, o presidente pode pedirche que pares e, se continúas, a comunidade pode levalo a xuízo (Lei de propiedade horizontal, art. 7.2).
Ter un animal non é en si unha actividade molesta. O que pode selo son os ladridos constantes, os malos cheiros ou a sucidade nas zonas comúns. Se os estatutos da túa comunidade din algo sobre animais, leos: sobre se poden prohibir telos dentro da casa hai sentenzas nos dous sentidos.
Zonas comúns
A comunidade pode poñer normas para o portal, o ascensor, o xardín ou a piscina, por exemplo que o can vaia con correa. A Lei 7/2023 obriga ademais a evitar que o teu animal lles cause molestias ou danos a outras persoas (art. 26.c).
Para levarse ben
- Se o teu can ladra cando queda só, non é mala educación: adoita ser ansiedade. Trabállao cun educador.
- Correa curta no portal e no ascensor, e agarda polo seguinte se alguén ten medo.
- Recolle e limpa axiña calquera accidente.
- Se hai unha queixa, fala primeiro co veciño antes de que chegue á xunta.